У Брэсцкай вобласці другая па краіне колькасць школьнікаў, што вучацца па-беларуску. Але іх становіцца менш

У Брэсцкай вобласці вучацца па-беларуску больш за 21 тысячу школьнікаў. Паводле апошніх звестак Белстата, у 2025/2026 навучальным годзе беларуская мова была мовай навучання для 21 437 вучняў, або 12,7% усіх школьнікаў вобласці.

Чытайце таксама: У Брэсце жыхары просяць вярнуць беларускую мову ў транспартныя табло і аўтаінфарматары

На гэтую статыстыку звярнула ўвагу праваабарончая ініцыятыва «Брэсцкая Вясна», якая параўнала паказчыкі розных рэгіёнаў Беларусі са спасылкай на дадзеныя Белстата.

Па колькасці школьнікаў з беларускай мовай навучання Брэсцкая вобласць займае другое месца ў краіне. Больш іх толькі ў Мінскай вобласці.

Але калі паглядзець не на агульную колькасць, а на долю ад усіх школьнікаў, карціна таксама змяняецца: у Мінскай вобласці беларускамоўную адукацыю атрымліваюць 16,4% вучняў, у Брэсцкай — 12,7%.

Як выглядае Брэсцкая вобласць на фоне іншых рэгіёнаў

Паводле звестак Белстата за 2025/2026 навучальны год, доля школьнікаў з беларускай мовай навучання па абласцях складае:

• Мінская вобласць — 16,4%;
• Брэсцкая вобласць — 12,7%;
• Гродзенская — 8,1%;
• Гомельская — 6,7%;
• Магілёўская — 6,2%;
• Віцебская — 4,3%;
• Мінск — 1,7%.

Як вынікае з гэтых дадзеных, Брэсцкая вобласць прыкметна адрозніваецца ад сталіцы: калі ў Мінску па-беларуску вучацца толькі 1,7% школьнікаў, то ў Брэсцкай вобласці гэты паказчык складае 12,7%.

Паводле дадзеных Белстата, усяго ў краіне беларускамоўную адукацыю атрымлівае значна больш школьнікаў у рэгіёнах, чым у Мінску. Аднак нават там, дзе доля вышэйшая, яна паступова скарачаецца.

Чытайце таксама: У Крычаўскім і Чавускім раёнах у грамадскім транспарце не засталося беларускай мовы

За тры гады паказчык у Брэсцкай вобласці знізіўся

У 2022/2023 навучальным годзе беларуская мова навучання была ў 14,2% школьнікаў Брэсцкай вобласці. Цяпер гэты паказчык складае 12,7%.

Атрымліваецца, за некалькі навучальных гадоў доля школьнікаў, якія вучацца па-беларуску, зменшылася на 1,5%.

Гэта важная розніца: агульная колькасць беларускамоўных школьнікаў можа заставацца значнай, але іх доля сярод усіх вучняў вобласці працягвае змяншацца.

Пры гэтым Брэсцкая вобласць усё яшчэ застаецца адным з рэгіёнаў, дзе беларуская мова навучання прадстаўленая значна шырэй, чым у сталіцы і шэрагу іншых абласцей.

Чытайце таксама: У шклоўскай калоніі палітвязняў караюць за беларускую мову

Чвэрць усіх беларускамоўных школьнікаў — з Брэсцкай вобласці

Ёсць яшчэ адзін паказчык, на які звяртае ўвагу «Брэсцкая Вясна».

Каля чвэрці ўсіх беларускіх школьнікаў, якія вучацца па-беларуску, прыпадае менавіта на Брэсцкую вобласць. Таму рэгіён застаецца адным з асноўных цэнтраў беларускамоўнай школьнай адукацыі ў краіне.

Аднак дынаміка апошніх гадоў паказвае, што нават тут беларуская мова паступова губляе частку сваёй прысутнасці ў школе.

Чытайце таксама: Праўладны блогер заявіў, што дыскрымінацыі беларускай мовы няма — у TikTok яму запярэчылі

Будь на связи и в безопасности: подключи BGlobal VPN

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро