Зноў закрываюць КПП на беларуска-расійскай мяжы. Каля яго ўпаў беспілотнік

У Гомельскай вобласці зноў спыніў працу аўтамабільны пункт пропуску «Селішча» — «Красный Камень», які знаходзіцца на дарозе ў бок Бранска.

Чытайце таксама: Фестываль «Славянскае адзінства» ў Бранску, імаверна, адмянілі: на фоне вайны не адбылося амаль ніводнага мерапрыемства

Пра гэта паведамляе тэлеграм-канал праваабаронцаў і журналістаў з Магілёва «Maydayteam».

Паводле апублікаванай інфармацыі, беларускіх кіроўцаў разварочваюць яшчэ да пункта пропуску — да праверкі дакументаў справа нават не даходзіць.

Прычынай стала падзенне беспілотніка каля КПП. Расейскія памежнікі пацвердзілі, што беспілотны апарат прызямліўся на дарогу і не выбухнуў.

Разам з тым з’явілася неафіцыйная інфармацыя пра атаку беспілотніка на грузавік на гэтай жа трасе. Яна пакуль не пацверджаная.

Падобнае ўжо адбывалася

Гэта не першы выпадак, калі рух на гэтым участку беларуска-расійскай мяжы абмяжоўваюць праз беспілотнікі. 11 жніўня КПП таксама закрывалі пасля атакі БПЛА. Тады, паводле паведамленняў, загарэліся грузавікі.

Цяпер дальнабойнікаў накіроўваюць на альтэрнатыўны маршрут — праз Верхлічы ў бок Чачэрскага раёна.

Сітуацыя адбываецца на фоне чарговай атакі беспілотнікаў на Бранскую вобласць. Расейскае Міністэрства абароны заявіла пра 426 збітых БПЛА над рознымі рэгіёнамі Расіі, у тым ліку над Браншчынай.

Бранская вобласць становіцца ўсё больш праблемным маршрутам для беларусаў

Бранская вобласць апошнім часам рэгулярна згадваецца ў паведамленнях пра беспілотнікі, выбухі і працу расейскай супрацьпаветранай абароны.

У чэрвені гэтага года там пацярпеў аўтобус беларускага перавозчыка, які выконваў міжнародны рэйс. Паводле інфармацыі беларускіх дзяржаўных медыя, некалькі пасажыраў атрымалі траўмы.

Пасля гэтага намеснік старшыні Гомельскага аблвыканкама Дзмітрый Алейнікаў назваў Бранскую вобласць «практычна прыфрантавой зонай». Пры гэтым у сацыяльных сетках з’яўляліся гісторыі беларусаў, якія едуць праз Браншчыну.

Напрыклад, сям’я з Гомеля, якая накіроўвалася на адпачынак у Кабардзінку праз Бранск, распавядала пра амаль пустую дарогу і праблемы з пошукам паліва. Паводле жанчыны, сям’я нават узяла з сабой дзве каністры дызельнага паліва.

Праблемы з палівам у Расіі раней ужо ўзнікалі на фоне ўдараў беспілотнікаў па нафтаперапрацоўчай інфраструктуры. Расейскія ўлады ўводзілі часовыя абмежаванні на экспарт бензіну, каб утрымаць прапанову на ўнутраным рынку.

Адмяняюць і аўтобусы з Гомеля

На фоне праблем з бяспекай змяншаецца і рэгулярнае транспартнае паведамленне паміж Гомелем і Бранскам.

З 17 жніўня аўтапарк №1 «Гомельаблаўтатранса» спыніў штодзённы рэйс «Гомель — Бранск», які адпраўляўся з Гомеля ў 15:00. Пра гэта паведамлялі «Моцныя навіны» са спасылкай на аўтапарк.

Афіцыйная прычына — рэйс «прыносіць шмат страт». Падобнае тлумачэнне раней давалі і пры скасаванні маршруту «Гомель — Новазыбкаў», спасылаючыся на нізкую запаўняльнасць.

Пасля скасавання штодзённага рэйса пасажырам застаецца, у прыватнасці, аўтобус «Гомель — Курск», які праходзіць праз Бранск і курсіруе праз дзень, а таксама асобныя рэйсы прыватных перавозчыкаў.

Пры гэтым чыгуначнае паведамленне паміж рэгіёнамі плануюць, наадварот, развіваць. Расійская чыгунка раней анансавала запуск цягніка Бранск — Гомель.

Рэгіён, праз які беларусы працягваюць ездзіць

Бяспека маршрутаў праз Бранскую вобласць стала асобным пытаннем пасля атак на транспарт.

У чэрвені, напярэдадні фестывалю «Славянскае адзінства», беларускія чыноўнікі ўжо называлі Браншчыну небяспечнай тэрыторыяй. Сам фестываль у выніку фактычна не адбыўся, хоць афіцыйнага паведамлення пра яго поўную адмену не было.

Пры гэтым за некалькі дзён да запланаванага мерапрыемства Алейнікаў назваў Бранскую вобласць «практычна прыфрантавой зонай».

Гэта прагучала пасля інцыдэнту з беларускім аўтобусам на трасе «Мяжа Беларусі — Новазыбкаў — Бранск». Паводле афіцыйнай версіі беларускіх і расейскіх уладаў, транспарт пацярпеў у выніку атакі беспілотніка, у якой абвінавацілі Украіну.

Пазней фатаграфіі пашкоджанага аўтобуса апублікаваў праўладны тэлеграм-канал. Яны сталі падставай для пытанняў адносна абставінаў здарэння: на здымках пярэдняя частка аўтобуса не выглядала моцна пашкоджанай, а дзяржаўны нумар знаходзіўся ў салоне пад аскепкамі шкла.

Чытайце таксама: Трагедия на пути к морю: поездка беларуских детей в Геленджик обернулась бедой под Брянском

Будь на связи и в безопасности: подключи BGlobal VPN

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро