Палітвязня Уладзіміра Гундара вярнулі ў бабруйскую калонію, дзе ён ужо адбываў пакаранне

У пачатку кастрычніка палітвязня і краязнаўцу з Баранавічаў Уладзіміра Гундара перавялі з магілёўскай турмы №4 назад у бабруйскую калонію №2.

Чытайце таксама: «Я, наверное, просто умру здесь». Кто из политзаключенных беларусов подвержен особому риску за решеткой

Пра гэта паведамляе «Радыё свабода».

У ПК №2 Гундар ужо адбываў пакаранне. У кастрычніку 2023 года яго адправілі адтуль у магілёўскую турму, дзе ён правёў наступныя тры гады.

Уладзімір Гундар — баранавіцкі актывіст і краязнаўца, палітвязень, які мае інваліднасць другой групы. Ён не мае адной нагі і перасоўваецца з дапамогай мыліц. Гундара затрымалі 30 снежня 2020 года ў межах справы Мікалая Аўтуховіча.

Спачатку атрымаў тры гады

Першапачаткова Гундара абвінавацілі ў гвалце або пагрозе гвалтам у дачыненні да службовай асобы — паводле арт. 366 Крымінальнага кодэкса.

Падставай для справы стаў ператрус у ягонай кватэры. Паводле абвінавачвання, падчас затрымання Гундар пагражаў следчым і разбіў свой мабільны тэлефон.

20 мая 2021 года Брэсцкі абласны суд прызначыў яму тры гады калоніі агульнага рэжыму. У межах «справы Аўтуховіча» Гундара спачатку таксама абвінавачвалі ў тэрарызме, але пазней гэтае абвінавачванне з яго знялі.

Пасля вынясення першага прысуду Гундар знаходзіўся ў СІЗА-7. У снежні 2021 года стала вядома пра яго перавод у турму №1.

Праваабаронцы паведамлялі пра ціск на палітвязня падчас зняволення. Яго змяшчалі ў карцар, а падчас аднаго з этапаў прымусілі ісці без мыліц. Таксама Гундар пісаў, што ў яго забралі ўсе лісты.

Новы прысуд па «справе Аўтуховіча»

Асноўны суд па справе Аўтуховіча пачаўся 18 мая 2022 года ў гродзенскай турме №1. Гундара абвінавацілі паводле ч. 1 арт. 285 КК — стварэнне злачыннай арганізацыі — і ч. 2 арт. 357 КК — замах на захоп дзяржаўнай улады неканстытуцыйным шляхам.

Сваёй віны ён не прызнаў.

Падчас допыту Гундар адмовіўся даваць паказанні, адказваючы на пытанні толькі сваёй адвакаткі. На адным з пасяджэнняў ён распавёў, што пасля затрымання яго збівалі людзі ў цывільным і патрабавалі прызнаць сябе саўдзельнікам Аўтуховіча.

У чэрвені 2022 года палітвязня змясцілі ў карцар. Ён абвясціў сухую галадоўку, пратэстуючы супраць дзеянняў суда і прымусовага распранання перад працэсам. Праз 11 дзён ён пачаў паступова прымаць ежу.

Пазней палітвязня яшчэ некалькі разоў адпраўлялі ў карцар. Сярод прычын называлі адмову падчас праверак казаць пра сябе, што ён «схільны да экстрэмізму», а таксама адмову жыць у адной камеры з іншымі зняволенымі.

17 кастрычніка 2022 года Гродзенскі абласны суд прысудзіў Гундару 18 гадоў калоніі ва ўмовах узмоцненага рэжыму і штраф 800 базавых велічыняў — 25 600 рублёў.

Да тэрміну дадалі яшчэ два з паловай гады

У снежні 2022 года супраць Гундара распачалі яшчэ адну крымінальную справу — за абразу пракуроркі Людмілы Герасіменкі, якая прадстаўляла абвінавачванне ў «справе Аўтуховіча».

17 красавіка 2023 года суддзя Алена Пятрова прызнала яго вінаватым паводле арт. 369 КК і прызначыла яшчэ два з паловай гады пазбаўлення волі.

Пасля частковага складання пакаранняў канчатковы тэрмін для Гундара склаў 20 гадоў калоніі ўзмоцненага рэжыму.

Паводле звестак праваабаронцаў, падчас зняволення ў палітвязня пагоршылася здароўе. У 2023 годзе ён часова страціў слых, пазней слых часткова аднавіўся. Таксама Гундар паведамляў пра пагаршэнне зроку і неабходнасць мацнейшых акуляраў.

З бабруйскай калоніі — у магілёўскую турму

У кастрычніку 2023 года Гундара перавялі з бабруйскай калоніі №2 у магілёўскую турму №4. Тады блізкія доўгі час не мелі ад яго вестак.

Палітвязня трымалі ў адзіночнай камеры. Прагулкі для яго ўскладняліся праз стан мыліц: гумавыя наканечнікі сцерліся, а замяніць іх у турме не было магчымасці.

Сваякі таксама паведамлялі пра праблемы з атрыманнем перадач і спатканняў. У ліпені 2024 года стала вядома, што Гундара пазбавілі чарговага кароткатэрміновага спаткання.

Апошнія гады ён працягваў заставацца ў магілёўскай турме. Цяпер яго зноў перавялі ў калонію №2 у Бабруйску, дзе ён ужо адбываў пакаранне.

Гундар знаходзіцца за кратамі з 30 снежня 2020 года. Да заканчэння прызначанага яму 20-гадовага тэрміну застаецца каля 13 гадоў.

Чытайце таксама: Былы палітвязень Аляксей Коршун, які адбываў тэрмін у Шклове, мог паехаць ваяваць за Расею

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро